طبخة حراء باصبعه

  

   ياأهلين بأحلى جارة , شلون  بعدين ظبطت هالزيارة ؟  

-          خليها لربك ياجارتنا والله ماعم افضى وخايفة يروح هالعمر خسارة  

-          يوه , ليش هيك عم تحكي ؟ شو رأيك .. تنفخيلك مع القهوة سيكارة ؟  

-          لأ دخيلك , الرجال وابنه مجننيني مو ناقصني تتعب صحتي وصير بأمرها محتارة  

-          يالطييف , واضح إنك تعبانة احكيلي شو عامل معك ابن هالختيارة ؟ 

-         شو قصدك الولد ولا .. أبوه ياجارة ؟ 

-          الله يسامحك أكيد قصدي جوزك  , يلي بتهابه كل الحارة  

-          شو بدي احكيلك كل كم يوم بيعمل خناقة مع ابنه مالها طعمة وبيعمل شوال من حبة خيارة  

-          ياسلام , جودي ياجارة واضح أن القهر عم يزيدك شطارة  

-          ببساطة جوزي بدو الولد يطلع أحسن شب بالحارة  

-          هذا حقه الطبيعي , وأنت لازم تفرحي إذا كان بيخاف على ابنه ولا بدك يطير ابنك من ايدك متل الطيارة ؟  

-          المشكلة جوزي ديموقراطي كتير , وبيحب يعطي الولد الحرية بكير ولما ابني أخد حريته وتركه بعمر ال 15 يلعب بالحارة .. بدل مايتعلم المرجلة تعلم سواقة السيارة  

-          بس ليكو يخزي العين شب ماأحلاه خلص جامعة  وأكيد بكرا أبوه بيدبرلو وظيفة دبارة  

-          والله ماخلص الجامعة وحدا يعرف حدا كنت اترجا أبوه يروح عالجامعة يشوف دراسته ويعتبرها زيارة , بس شو بدك تحكي تركوا يشتغل على كيفوا وإذا قصر وغلط منصير سيرة بتم الكبير والصغير وكل شباب الحارة  

-          الله يعينك فعلاً قصتك قهارة .. طيب ليش أنت مابتحكي مع أبوه يعامله كنو أخوه الصغير ويفهمو أمور الحياة وكل خباياها وأسرارا؟ 

-          حكيت كتير وقليل بس مافي فايدة  دقي المي وهي مي لا الزلمة عم يفهمني ولا ابنو عم يتنازل لأبوه , وخايفة بالأخير توقع براسي واكسر الجرة حتى لو كانت فخارة  

-          طولي بالك , كلنا بالهوا سوا , قال قلبي على ولدي وقلب ولدي عالحجر .. وهداك اليوم سمعت الشيخ عو يقول : أعينوا أولادكم على بركم .. أي بر هاد , والله  خايفة يصير قلب ولدي مو بس عالحجر .. على كل الحجارة  

-          الحقيقة الغلط غلطنا بس ماحدا بيعترف الهزيمة , كلنا بدنا نربح مع أن التربية مافيها ربح ولا خسارة  

-          حاجتك فلسفة , وجعتيلي راسي , شو طابخة اليوم ؟  

-          لاتخافي جبتلك الصاروخ معي .. رح اطبخ ( حراء اصبعو ) خدي اقرئي التعليمات من الصاروخ , قصدي الورقة  وإذا مافهمت شي اطبخي مفركة بطاطا  وقطعي جنبها خيارة .. 

المقا دير:
كوب عدس (حَبّ  (
5
بصلات      +    باقتان من الكزبرة الخضراء   +   رأس ثوم مدقوق
1/2
كوب من عصير الحامض
ملعقة صغيرة من دبس الرّمان
1/2
رغيف خبز عربي مقطّع إلى مربّعات   ) أو كوب من المعكرونة العريضة   (
 
كوب وربع الكوب زيت نباتي
ملعقة طعام من الملح
رشة كمّون ورشة بهار

طريقة التحضير :
ـ يُنقّى العدس من الأوساخ ويغسل، ثم يضاف إليه 6 أكواب ماء ويوضع على النار حتى يغلي. تخفف النار ويترك عليها حتى    يغلي مرّة أخرى مدة 20 دقيقة، أو حتى ينضج قليلاً  .
ـ يقطع البصل جوانح رفيعة ويقلى بنصف كوب من الزيت حتى يحمرّ لونه قليلاً  .
تفرم الكزبرة الخضراء ناعماً ثم تغسل وتصفى  .
ـ يدق الثوم ويضاف إلى الكزبرة ويوضع المزيج   في مقلاة على النار ويضاف إليه ربع كوب زيت، ويحرك حتى تذبل الكزبرة، عندها يرفع عن النار  .
ـ يضاف الملح والتوابل إلى العدس   مع نصف كمية الكزبرة المقلية ونصف كمية البصل المقلي مع عصير الحامض ودبس الرمان، ويوضع المزيج على النار ويترك مدة 10 دقائق
ـ يقطع الخبز إلى مربّعات ويقلى بنصف كوب زيت على نار قويّة حتى تحمرّ القطع ( يمكن استبدال الخبز بقطع عجين )
يوضع الخبز في طبق كبير ويصب فوقه خليط   العدس ثم يزيَّن ببقية الكزبرة المقلية والبصل المقلي وبعض الخبز المقلي  .
ـ يقدم العدس ساخناً  .
ملاحظة: يضاف حسب الرغبة ( فول أخضر + سلق مفروم ) ويستحسن أن يكون خليط العدس جامداً قليلاً  .
الكمية تكفي 6 أشخاص
عدد السعرات الحرارية =950
وصحتين وعافية


Copyright © alazmenah.com - All rights reserved 2018